وانا فى طريقى من القاهره للغردقه وقبل الغردقه بحوالى خمسين كيلو والدنيا ظلام جدا وصحرا وفجأه الفرده اليمين من العربيه ضربت ركنت العربيه ونزلت لقيت كلب بيهوهو دعيت ربنا يحفظنى والحمد لله ربنا طمن قلبى ومكنتش خايف الكلب مشى سمعت صوت قطه صغيره بتنونو قلت فى نفسى ايه اليجيب قطه فى الصحرا كده يمكن جن وعملت نفسى مش واخد بالى وطلعت الكوريك ورفعت العربيه ورايح اجيب الاستبن لقيته نايم ولوحدى فى الصحرا مفيش قدامى غير انى اشاور لاى عربيه تقف بدات اشاور فعلا مفيش حد رضى يقف الناس خايفه والطريق فعلا يخوف ملقتش ملجا الى انى ادعو الله دعيت ربنا لقيت واحد بدوى طلعلى منين معرفش وقف معايا بس علشان يطمنى بس مقدرش يعمل حاجه لان الموضوع معقد وملوش حل وفجاه جتلى فكره انى اتصل بالنجده ولسه بطلع الموبايل لقيت الراجل البدوى بيقولى انت بتعمل ايه الحجات دى فى الافلام بس بصراحه بينى وبين نفسى اكسفت انى اطلب نجده من غير الله فدعيت ربنا وبدون اتصال منى باى حد اقسم بالله لقيت عربية نجده جايه وبتقولى فى ايه هما كمان مقدروش يعملو حاجهغير انهم يوقفولى اى عربيه اركب معاها لحد الغردقه اصلح الفرده وارجع بيها تانى وفعلا وقفو عربيه طلع العربيه دى معاها منفاخ نفخلى الفرده واحنا واقفين لقيت القطه الكانت بتنونو بتعدى الطريق صغيره اوى ولونها اصفر الحمد لله ركبت العربيه ورجعت الغردقه ووصلت عند البيت بركن العربيه سمعت صوت قطه دورت فى العربيه مفيش وفى الشنطه مفيش قلت شغل العفاريت بدأ بفتح الكبوت لقيت القطه قاعه ومحصلهاش اى حاجه سبتها على الارض لقتها جريت ومقدرتش اقول اى حاجه غير سبحان الله ربنا عمل كل ده ووقفنى فى المكان ده بالزات عشان انقذ القطه ولما دعيت ربنا بعتلى الناس عشان تنقذنى واكيد القطه كمان دعت ربنا باللغه بتاعتها ...... سبحان الله العظيم كل شىء بقدر الله ربنا رحمن رحيم حتى بالحيوانات انقذ قطه من فوق سبع سماوات قادر على كل شىء...
..(وكل شىء جعلناه بقدر ).........
( وما من دابة في الأرض إلا على الله رزقها ويعلم مستقرها ومستودعها كل في كتاب مبين )