اهلا وسهلا بكل من شرف هذا الموضوع بالاطلاع عليه وبقراءته
محدثكم ( فارس الجحيم ) قائد الاكاديمية
وارجو منكم جميعا حزم الامتعة وربط الاحزمة كي نطير بالاكاديمية جميعا في رحلة استكشافية
مفيدة وممتعة ومشوقة عن كل ما يخص ( الاذن الروحاني )
مع خالص تمنيات فارس الجحيم قائد الرحلة للجميع بقضاء رحلة ممتعة ومفيدة ومشوقة
والان فالنبدأ الاقلاع . . . . . .
تقريبا كده مفيش حد فينا موردش علية كلمة ( الاذن الروحاني ) اعتقد كلنا سمعنا المصطلح الغريب ده
في معظم المواقع والمنتديات وخصوصاً في الفترة القريبة الحالية وبشكل تقريبي اكثر من
حوالي 10 سنوات والى الان والكلمة الغريبة دي بنسمعها كتير جدا من اشخاص كتير جدا
منهم اصحاب العلم اللي نثق فيهم ومنهم اصحاب المنافع والاستغلال والجهل
ومش كده وبس لا وفيه بعض ناس مننا كمان ممكن يكون شافها في بعض الكتب والمخطوطات
وناس كتير على الانترنت بتقول ان الاذن الروحاني مجرد خدعة وكذب وناس تانية بتقول انه حقيقي
وامر موجود بالفعل .. وطالب العلم لا حول له ولا قوة .. محتار ومتخبط ومش عارف يصدق مين
ويكذب مين !!! واللى بيزيد المسألة حيرة اكتر هو اننا ممكن نكون نعرف اشخاص في حياتنا نثق فيهم جدا
منهم اللى بيأكد انه بينجح في العلوم بدون الاذن الروحاني ومنهم من يؤكد انه لم يصل الى النجاح الا
بعدما حصل على الاذن الروحاني .. وده جعل من الامر لغز كبير جدا كتير منا مش قادر يفسره او يفهمه
او يوصل لقرار حقيقي في المسألة دي !!!
انا بقا جاي انهاردة عشان احل اللغز ده لكل محتار ومتخبط وانور بصيرتكم جميعا واشرحلكم لغز
الاذن الروحاني ده بالتفصيل ومش طالب منكم غير سعة الصدر وقراءة الموضوع بشكل هادئ
وجيد عشان الكل يفهم الحقيقه .. وزي ما اتعودنا هيكون فيه بعض الادلة والاثباتات المنطقية والعقلانية
عشان كلنا نقدر نعقل الكلام ونفهم المعلومة بشكل جيد وميبقاش الدرس مجرد كلام وخلاص
والشرح انهاردة هيكون بطريقة جديدة ومختلفة علشان تسهل الفهم للجميع
والطريقة هتكون عبارة عن اننا كلنا هنتخيل ان فارس الجحيم قاعد .. وقاعد معاه متحدث رسمي
بيتكلم مع فارس بإسم كل طلاب العلم واللى محتاجين يفهمو اصل الموضوع ده
والتخيل ده هيكون في صورة سؤال وجواب بين المتحدث الرسمي بإسم طلاب العلم
وبين فارس الجحيم .. ومش عاوز حد يقلق هيتم طرح كل الاسئلة اللي بتخطر في بالكم بدون
استثناء اي سؤال مهما كان اللى بتفكرو فيه واللى عاوزين تسألوه هتلاقوه موجود في المحادثه دي
ودلوقتي نبتدي المحادثة والاسئلة
طالب العلم : ايه رأيك يا فارس في موضوع الاذن الروحاني ده ؟ حقيقي ولا كذب ؟
فارس الجحيم : بصراحة تقدر تقول حقيقة وكذب في وقت واحد .
طالب العلم : لا حول ولا قوة الا بالله .. ارحمنا يا فارس احنا من ناقصين الغاز وفهمنا الموضوع ؟
فارس الجحيم : والله مش الغاز هو فعلا مقسوم الى جزئين نصفه حقيقه ونصفه كذب .
طالب العلم : ازاي يعنى تقصد ايه ممكن توضح كلامك اكتر ؟
فارس الجحيم : اقصد ان فيه حاجة بالفعل اسمها اذن روحاني ولكن ناس كتير بتنخدع فيها ومش فاهمين معناها الحقيقي وده بيأدي ان النصابين والجاهلين بيسغلوا جهل الناس بحقيقة الاذن الروحاني عشان يتوصلوا لمكاسب مادية .
طالب العلم : حلو اوي .. خلينا بقا دلوقتي في الجزئ الخاص بالحقيقة .. عاوزين نعرف ايه هو الاذن الروحاني الحقيقي ؟
فارس الجحيم : حاضر .. زمان في العصور القديمة قبل نزول الاسلام كان فيه كثير من السحرة وكان كل ساحر له طريقة علمية خاصة بيه هو .. وكان كل ساحر او على حسب المسمى المتعارف عليه دلوقتي ( الشيخ ) كان كل فرد منهم له مجموعة من التابعين له من المساعدين والمتعلمين اللى بيدرسو عنده وبيتعلمو منه الطريقه الخاصه بيه .. واحيانا بيحصل ان احد الطلاب او المساعدين كان ممكن يسرق بعض الاسرار من الساحر ده او بعض الطرق ويذهب بها ويستقل بذاته او يقوم بتعليم الناس بنفسه او يذهب لساحر مختلف عشان يتعلم منه طرق وامور مختلفه وزادت المشكلة دي بحجم كبير لدرجة ان كل السحرة اصبحوا حريصين جدا في التعامل مع المتعلمين لديهم .. ومش كده وبس بل اصبحوا هما اللى بيختاروا مين يتعلم عندهم ومين لاء واحيانا كانوا بيعملوا اختبارات قوية جدا لمن يريد الانضمام لهم وكانت اختبارات صعبه ولا ينجح فيها الكثير .. ولكن كلها كانت محاولات منهم للحفاظ على علومهم واسرارهم والطرق الخاصة بهم .. الى ان توصلوا لمسألة ( الاذن الروحاني ) والتي ظهرت بعد ظهور الاسلام .. وهنذكر ليه تحديدا ظهرت بعد ظهور الاسلام .. المهم ان من بعد ما تم انشاء مسألة الاذن الروحاني من وقتها توقف جزئ كبير من نزيف العلم والسرقة للعلوم والطرق الخاصة بهم .. وكان مفهوم الاذن الروحاني وقتها بالنسبة للدارسين هو عبارة ان انه لا يقدر ان ينجح في اى باب او عمل او دعوة الا بعد حصوله على الاذن الروحاني من الشيخ المسؤل عن هذه الدعوة او المشتغل بها فقط .. ومن هنا بدأ كل المتعلمين وقتها يقتنعوا انهم مستحيل هينجحوا في طريقة الا اذا حصلوا على الاذن الروحاني من صاحب الطريقة .. ده بجانب ان صاحب الطريقة او الشيخ حتى بعد اعطائه الاذن الروحاني للطالب .. اذا قام الشيخ بسحب الاذن الروحاني من الطالب وقتها يتوقف عن النجاح في ما تعلمه من هذا الشيخ .. واصبح موضوع الاذن الروحاني مثل المفتاح في يد الشيخ اذا اعطاه للطالب انفتح له الباب وان سحبه من طالب انغلق عليه الباب .
طالب العلم : حلو اوي .. كده احنا عرفنا ايه هو الاذن الروحاني وازاي الشيوخ او السحرة كانوا بيستخدموه مع طلابهم .. وكان الهدف الحفاظ على علومهم وطرقهم من السرقة والضياع .. بس لحد دلوقتي بردو احنا لسه معرفناش الاذن الروحاني عبارة عن ايه اصلا ؟ يطلع ايه الاذن الروحاني ده اللى كانو الشيوخ والسحرة بيلعبوا بيه مع الطلاب ؟
فارس الجحيم : الاذن الروحاني كان بيتلخص في الفهم والادراك والمعرفة والتحكم والعلم والالمام بالامور والوساطه .. وانا هشرحلك انا اقصد ايه .. على سبيل المثال لو حضرتك متخصص في قيادة سيارة من طراز محدد .. ومكثت في الوظيفة دي حوالي 10 سنوات وقتها ايه الامور اللى بتكتسبها ؟ بتكون اصبحت ملم بكامل تفاصيل السيارة اللى انته بتشتغل بيها وبتكون اصبحت ملم بمعظم تفاصيل الطرق اللى انته بتمشي فيها بالسيارة وبتكون اصبحت مدرك لمعظم الاعطال وطريقة اصلاحها اللى ممكن تتعرض لها السيارة لان ده بينتج من الخبرة والممارسة والمعرفة على المدى الطويل وطريقة التعامل السليمة مع السيارة اللى توصلت ليها بعد عدة طرق من التعامل الغير صحيح .. وهنا انته بتكون خبير في كل ما يخص السيارة اللي انته بتشتغل عليها ولذلك لما يجي موظف جديد لسه هيتعلم القيادة لنفس السيارة اللى انت بالفعل متخصص فيها .. وقتها انت خبرتك بتكون اعلى منه بكتير جدا وتقدر تديله كل النصايح اللى تسهل عليه التعامل مع السيارة دي وبتكون على علم بكل اعطال السيارة اللى ممكن هو يتعرض ليها وكمان بيكون عندك الحلول اللى تقدر تقدمهاله في حالة لو حدث عطل .. طيب لو احنا فرضنا انك منعت عنه المعلومات دي ايه اللى هيحصل !! وقتها ممكن يظل مدة طويلة جدا من الزمن بيتخبط في مشاكل واعطال وامور كتير مع السيارة والطرق لانه ليس ملم بهم ولا يوجد عنده الخبرة الكافية اللى تخليه يتخطى العقبات دي بسهوله او لا يقع فيها من الاساس .. نترك مجال السيارات بقا والمثال ده ونعود لموضوعنا وهو الاذن الروحاني .. نفس الامور بتنطبق على الاذن الروحاني لما بيكون فيه شيخ ضاع من عمره اكثر مما بقي له وافنى ما ضاع في بعض تخصصات العلوم او بعض الطرق او دعوة ما او بعض الابواب وقتها بيكون وصل للتمكن التام في ما يعمل به .. وهنا لما بيجي طالب علم جديد عاوز يتعلم ان خطف العلوم من الشيخ وهرب وقتها سوف يتخبط فيها وسيفشل في معظمها وقد يصيب نفسه بضرر احيانا نظرا لتعامله الخطئ مع هذا العلم وهذه الطرق .. لان طالب العلم دائما عنده طمع للوصول وعنده شغف وعقله بيكون غير مدرك لحجم قيمة العلم ودائما بيعتقد ان العلم عبارة عن قاعدة اذا عرف طريقتها يقدر ان ينجح فيها .. وده خطئ كبير جدا وغير صحيح .. لان العلوم الروحانية بحر واسع لا اول له ولا اخر .. واي شخص يريد التعلم اذا وضع تركيزه على الثمار وقتها لن يجنيها نظرا لكثرة الاشواك التي سوف تصيبه .. ولكن الاصح والافضل ان يضع عينه وتركيزه على الخطوات التي يسير بها ويكون صبور ومجتهد وذو همة وعزم ولا يعرف اليأس طريق له ويصنع من الفشل محاولات اخرى .. وقتها ينجح فيما يريد .
طالب العلم : كلام جميل جدا يعنى نفهم من كلامك ان الاذن الروحاني عبارة عن خبرة ومعرفة ووعي والمام بالامور وفهم للطريقة او للعمل اللي بيقوم بيه الشيخ وبس صح ؟
فارس الجحيم : لا طبعا مش كده وبس .
طالب العلم : ربنا ياخدك يا فارس عشان نرتاح منك .. ما تقول ياعم وتخلصنا هو انته لازم ترغي كتير وتقعد تقول الكلام بالقطاره ؟؟!!
فارس الجحيم : حاضر يا سيدي هقول والله اهدى بس شويه .. انا بقول الكلام على مراحل عشان كله مرتبط ببعضه ولازم اشرحلك كل حاجه بالتفصيل عشان تبقى فاهم ومحدش يدحك عليك بعد كده .. اسمع يا عم من غير ما تتعصب .. اخر جزئين في مسألة الاذن الروحاني الحقيقي هما ( الوساطه و الطاقة المرتفعة ) .
طالب العلم : والله انته يومك ازرق يا فارس زي لون الكتابه اللى انته بتتكلم بيها .. ودول يطلعو ايه كمان ؟ هو كمان الروحانيات فيها وساطة ؟
فارس الجحيم : والله انته طالب لسانك طويل وانا شكلي هبعت استدعي ولي امرك يا اما هسيبك وامشي .. اسمع بقا عشان تفهم وانا هقولك كل حاجه .. الوساطة دي فيها تشابه كبير جدا من الوساطه اللى بعض الناس بتاخدها في مجتمعنا الحالي في مجالات عملهم او شغلهم .. زي توصية .. والطاقة المرتفعة هي طاقة الشيخ او الساحر اللى بيكون افنى من عمره ما لا يقل عن 25 عام ان لم يكن اكثر في الطريقة التي يعمل بها .. وهنا بيكون عنده تواصل قوي ومكانة كبيرة عند الخدام وكل ما بيستديم اكتر في طريقته مع الخدام كلما ارتفعت مكانته وزادت طاقته واصبح قضاء طلباته اسرع واقوى .. فهنا الشيخ او الساحر بيكون كلامه وطلباته من الخدام بيكون له استجابه ووقتها بيقدر الشيخ او الساحر انه يعمل توصية للطالب اللى هيقوم بطريقة او عمل او وصفة الشيخ اعطاها له .. وهنا الخدام بيتغاضو عن عيوب ومشاكل كتير ممكن تعيق نجاح الطالب ده وبيستجيبوا له بشكل سريع دون لحاجة للحصول على طاقة كبيرة من الطالب لانهم كانوا بيستعوضوا الطاقة المفقوده للطالب من خلال انهم بيستمدوها من الشيخ او الساحر .. وهنا بقا طلاما ان الطالب مستديم ومستمر تحت طوع وتعليمات هذا الشيخ او الساحر بيظل يحصد نجاح وبمجرد ما بيترك الطالب الشيخ او الساحر بينقطع الشيخ عن توصية الخدام على الطالب وبالتالي بتنقطع الطاقة اللي بيستفيدو بها الخدام لمساعدة الطالب وهنا بيتوقفوا عن مساعدة الطالب طول ما هو بيخطئ او لا يسير بشكل صحيح .. وطبعا بيكون الساحر او الشيخ قبلها زرع مفهوم الاذن الروحاني في عقل وقلب اطالب وبيكون الطالب شاف النتيجة بعينه فوقتها بمجرد ان يتركه الطالب ويفشل في اول عمل يقوم فيه بدون الشيخ بيتذكر كلام الشيخ وبيصاب بإحباط كبير يبعد تفكيره عن طريقة معرفة السر والاخطاء والنجاح .
طالب العلم : ينهااار اسود !! يعنى نفهم من كلامك ان مفيش حد هيقدر ينجح في العلم ده بدون شيخ يعطيه الاذن ؟
فارس الجحيم : لا طبعا الموضوع مش كده خااالص .. انا كنت قاصد اقول ان دي الفكرة اللى كانت كل الشيوخ بتزرعها في عقل الطالب عشان ميحاولش ينجح من غيرهم .. ولكن طبعا من اراد النجاح وسار في طريق النجاح واجتهد وتعب من المؤكد سوف ينجح لا محالة ولكن الفرق .. ان الطالب بدون مرشد او شيخ بيكون طريقه صعب مش ميسر لان بيكون فيه عناصر كتير هو مفتقدها وفيه امور كتير بتكون غائبه عن عقله لانه بيكون غير مدرك لحجم وقيمة العلم بالشكل الحقيقي وده هو اللى بيتعب فيه ولكن ان صبر واجتهد وداوم من المؤكد انه هينجح فيما يريد .
طالب العلم : تمام يعنى نقدر نقول مثلا ان قصدك لكل مجتهد نصيب وكل شخص على حسب اجتهاده وايمانه بالعلم وبنفسه .. بس فيه حاجه احنا لسه مش فاهمينها ؟ هو ليه طالب العلم زمان كان اصلا بيهرب من الشيخ او الساحر وبيحاول يروح لحد تاني طلاما كده او كده هو بيتعلم وبيستفاد وبينجح !!؟؟
فارس الجحيم : بص يا سيدي .. زمان كان طالب العلم لا يحق له ابدا ان يستقل بنفسه طول ما الشيخ او الساحر عنده القدرة على العمل وطول ما الشيخ عنده صحة وتركيز .. يعنى طالب العلم زمان كان ممكن يظل حوالي من 10 سنوات الى 20 سنه واحيانا اكتر وهو يعتبر ملكية خاصة للشيخ او للساحر مجرد مساعد او طالب ولا يحصل من العلم الا على قطرات قليلة جدا من وقت لاخر .. ده بجانب ان طول ما طالب العلم بيتعلم من الشيخ او الساحر بيكون مثل العبد بالمعنى الحرفي .. يعنى كان بيخدم الشيخ او الساحر في كل شئ حتى في امور النضافة والطعام والشراب والخدمة في كل شئ .. اضافة على ان طالب العلم ممكن بعد ما يذهب للشيخ ويعطي للشيخ العهد انه يكون خادمه طوال حياته مقابل العلم بيكتشف بعد ذلك ان الطريقه او الطريقتين او العمل او العملين الذي يعمل بهم الشيخ ليس هذا غرضه وليس هذا ما يريد فكان وقتها تصرف الطالب اما انه يسرق نوتة الشيخ ويهرب وان لم يستطيع ان يسرقها كان يحصل على ما يقدر عليها من المعلومات والقواعد ثم يهرب منه .
طالب العلم : لالالا لحظة واحده يا فارس تقصد ايه ؟!! قصدك تقول ان زمان الشيوخ او السحرة كان كل واحد فيهم لا يعمل غير بطريقة واحدة او عمل واحد او اثنين على الاكثر او دعوة واحدة فقط !! انا مش قلتلك قبل كده يا فارس ابوس ايدك تبطل تشرب فودكا قبل ما تكتب موضوع ؟ عشان بتبقى مسطول وبتقول كلام مش مظبوط ؟
فارس الجحيم : يا حبيبي والله انا مش شارب فودكا ولا غيرها وواعي جدا للي بقوله .. ولكن مع الاسف انتم اللى بتصدقوا الكاذبين والمنافقين والجاهلين الموجودين في هذا الزمن واللى بيقنعوكم انهم بيشتغلوا في كل حاجه علوي وارضي وسفلي وكأن العلم اصبح ( سمك لبن تمر هندي ) دي الحقيقه والله العظيم ان زمان كان الشيخ الواحد او الساحر الواحد كان ممكن يفني عمره كله لا يعمل غير بدعوة واحدة فقط او ببعض الاعمال التي لا تتعدى 5 اعمال كحد اقصى .. وده كان سر نجاحهم وتفوقهم فيما يعملون وهو التخصص وكان كل شيخ منهم زمان لا يملك الا نوتة واحدة فقط او مخطوط واحد فقط وبيكون من كتابته هو مثل مرجع لنفسه يكتب فيه ما يصل له من نجاح ويقوم بتعديل ما يكتشف انه خطئ .. وكان احيانا البعض منهم عندما يصل اليه طالب متهرب من شيخ سابق او من ساحر اخر كان الطالب بيقدم كل ما معه من علم للشيخ الجديد او الساحر الجديد عشان يتقبله عنده ويقوم بتعليمه ويتكفل به .. وده السبب اننا في العصر الحالي احيانا نجد مخطوطات في الاصل مكتوب عليها للشيخ الفلاني .. وعندما نتصفحها نجد فيها بعض الطرق مكتوب عليها من الاعلى ان هذه الطريقة مأخوذة عن الشيخ فلان .. وهنا كنا الشيخ الجديد او الساحر الجديد يكتب اسم الشيخ الاخر او الساحر الاخر ليس من باب الامانة وحبه له لالالا .. ولكن لانه لا يعمل بهذه الطريقة ولا يقدر ان يجربها بنفسه لانه يعمل بطريقة اخرى تحكم عليه عدم العمل بأمر اخر .. فوقتها عند وقوع المخطوط في يد جيل اخر من الناس ويجربون طريقة من المخطوط بشكل عشوائي ولا تنجح معهم .. وتكون هذه الطريقة ليست ملك للشيخ صاحب المخطوط فلا يقوم الناس بتلويث سمعة الشيخ صاحب المخطوط او محو تاريخه واتهامه بالجهل .. فلهذا كان الشيخ الجديد يبرئ زمته من القيل والقال عن طريق ان يكتب اسم صاحب العمل او صاحب الطريقه على الطريقة فوقتها لو صحت مع الناس .. زادت شهرة وسمعة وتاريخ الشيخ صاحب المخطوط وان لم تصح .. فلا يصيب الشيخ صاحب المخطوط العار وينسب الفشل لصاحب الطريقة فقط .
طالب العلم : يا ولاااد العفاااريييت ههههههه ال واحنا اللى كنا فاكرينهم طيبين وغلابه ؟ دول طلعو شيوخ صيع ومخهم يوزن بلد بمن فيها هههه .. طيب احنا بردو لسه معرفناش ايه السر وراء ان مسألة الاذن الروحاني لم تظهر الا بعد ظهور الاسلام ؟!! اية علاقة الاسلام اصلا بمسألة الاذن الروحاني ؟!!
فارس الجحيم : لان فيه امور كتييير جدا اتغيرت في الكون بعد ظهور الاسلام وكان من ضمن الامور دي هي .. ان قبل الاسلام كانت الجن والشياطين لها صلاحية في ان تتشكل في هيئة شبية للبشر وكانو يسيرون بين الناس وكانت لهم بعض العلامات التي يعرفونها الناس بهم انهم من الجن او من الشياطين .. هذا بجانب ان قبل ظهور الاسلام بحسب كلام الدين كانت الجن والشياطين تقعد في السماء مقاعد لتسمع الغيبيات والمستقبل وتنقله للساحر او من يتواصل معهم وكانو وقتها معروفين تحت اسم المنجمين .. فقبل ظهور الاسلام كانت هناك الف وسيلة يمكن للطالب المتعلم ان يكمل تعليم ما يريد بدون الحاجة للشيخ كان ممكن يصادف ان يقابل احد الجن او الشياطين ويطلب منه العلم وكان يحصل بينهم اتفاق ( العهد ) وكان وقتها الجن او الشياطين يعطوا الطالب ما يريد في مقابل ( العهد ) بدليل قول الله تعالى .. واتبعوا ما تتلوا الشياطين على ملك سليمان .. وما كفر سليمان ولكن الشياطين كفروا .. يعلمون الناس السحر وما هم بضارين به من احد الا بإذن الله .. وهنا في هذه الايات اعتراف واضح وصريح ودليل قاطع على ما اقول ان الشياطين هي من كانت تتعامل مع البشر وقتها وهي من كانت تتواصل معهم وتعلمهم السحر وخلافه من ما يطلق عليه الان ( العلوم الروحانية ) اما بعد نزول الاسلام تم سحب هذه الخاصية من الجن والشياطين واصبح بينهم وبين البشر حجاب ولا يتم خرق الحجاب او التواصل بينهم الا تحت شروط وظروف معينه قاسية وصعبه على الطرفين .. وهنا بعد نزول الاسلام وظهور الصوفية والشيعة واصبح لهم طرق ومذاهب واصبح منهم من تتطرف الى العلوم الروحانية فكان كل منهم له طريقة وله علمه الذي يقبض عليه ولا يعطيه للطالب الا بحساب .. وكانت معظم الطلاب مجبرة على الطاعة لانهم يعلمون ان ليس لديهم وسيلة اخرى للتعليم اذا تركوا الشيخ بل ويعلمون ايضا انه بدون الشيخ وبدون الاذن الروحاني لن ينجح الطالب ابدا في طريقة الشيخ .. وكانو الشيوخ يقنعوهم بهذا دائما حتى اصبحت فكرة راسخة وسائدة في عقول جميع الطلاب .. حتى ان فكرة الهرب من شيخ الى شيخ اخر لم تعد لها وجود نظرا لمعرفة كل شيخ وايمانه ان الطالب لن يستطيع ان يتلقى العلم الا عن طريقه .. واصبح كل شيخ لا يتقبل اى طالب هارب اليه حتى ولو معه بعض العلوم يقدمها كهدية للشيخ لان وقتها الشيخ يعلم انه مثلما فعل مع الشيخ الذي قبله سيفعل هذا معه ايضا وسيسرق علومه في احد الايام ويذهب بها الى غيره .. نظرا لعلم الشيخ انه لا وسيلة اخرى امام الطالب للتعليم الا من خلاله فقط فأصبح كل شيخ يقبض على علومه كما يقبض الانسان على روحه خشية ان تضيع منه .. فأصبحت فكرة هروب الطالب من شيخ الى شيخ امر شبه مستحيل لانه لن ينتفع بشئ .
طالب العلم : تماااام جدا كده وصلت المعلومة .. طيب والناس اللى بتتكلم عن الاذن الروحاني الايام دي وبيقولوا على نفسهم شيوخ الكلام ده حقيقي ولا كذب ؟ وازاى نقدر نفرق بين اللى يملك اذن حقيقي واللى بيحاول يستغلنا ؟
فارس الجحيم : مع الاسف ما لا يقل عن 80% من الموجودين الان اللى بيدعوا انهم شيوخ ليس لهم في العلم من شيئ .. بل وحتى المواضيع اللى بيكتبوها لا يردو على الاعضاء فيها من حيث الاسئلة والاستفسارات نظرا لانها في الاصل ليست مواضيعهم بتكون منسوخة من موقع اخر او بشكل اوضح من جاهل اخر .. او ماخوذة من كتاب او مخطوط وهم لا يعرفون اى شئ عن ما نقلوه .. انما مجرد ينقلون لابهار الناس وجذب الانتباه لهم لتحقيق بعض المكاسب المادية او الشهوانية القذرة التي تشبههم تماما .. وعشان تقدر تفرق بين من له القدرة على اعطائك الاذن الحقيقي ومن يكذب عليك ويدعي هذا الامر وهو لا يملكه .. الامر بيتلخص في الامور الاتيه .. اذا اعطاء احد طريقة او عمل او دعوة وطلبت منه الاذن وقال لك ادفع المال اولا تأكد انه كاذب ولا يملك اذن ولا غيره .. اذا اخذت طريقة من موقع او من شخص او دعوة او عمل وطلبت منه الاذن واعطاء بعض من اسماء الله الحسنى بأعداد محدده قبل ان تعمل بالطريقة او صيغة للصلاة على النبي وغيرها من هذه الامور المتشابهة فكل هذا كذب وافتراء .. لان الطريقة التي اعطاها لك او التي اخذتها طلاما ان فيها اسماء سريانية او غير عربية فهي ليس لها علاقة ابدا بما يقول هو .. ولا انكر ان بعض اسماء الله الحسنى ترفع من طاقة طالب العلم وتمكنه من الوصول بشكل اسرع ولكن لا يطلق على هذا الاذن الروحاني .. انما يكون الامر مثل تحفيز وتقوية للطاقة فقط ولا يمت للاذن الروحاني بصلة .. اما من يشرح لك الطريقة التي يعطيها لك بالتفصيل ويخبرك بكل خطواتها وعلااماتها من قبل ان تبدأ انت فيها فهذا يكون شخص مأذون .. بمعنى انه لا يملك خدمتها ولكنه عمل بها سابقاً وملم بالطريقة وما فيها .. اما من تأخذ منه طريقة ما ويخبرك انه سيرسل لك خادم في المنام يفعل لك كذا وكذا او يخبرك بكذا وكذا او يقول لك انا من عند الشيخ فلان .. فهذا فقط هو من يملك الاذن ويقدر ان يعطيه لك .
طالب العلم : حلو اوي لحد كده يا فارس عشان انا راسي صدعت من كتر كلامك .. عمال ترغي كتييييير لحد ما تعبتني ههههه بس بصراحه مش هنكر اني استفدت من المعلومات دي .. بس بلاش تعمل مواضيع شرح تاني بقا عشان انته بتنسى نفسك في الكلام ومش هنعرف نتحملك بالشكل ده هههه
فارس الجحيم : بقااااا كده !! يعنى بعد كل التعب ده وكمان مش عاجبك وطلعت انا رغاي ههههه ماشي ياعم كتر خيرك .. عموما انا مكنتش بكتب كل ده عشانك اصلا ده عشان كل اصدقائي متابعين واعضاء اكاديمية النور والنار اللي اتمنى يكونوا كلهم استفادوا ووضحت الصورة لهم .. وطبعا اي سؤال او استفسار عندكم انا كالعادة تحت امر الجميع وهرد عليكم في كل شئ حابيت تعرفوه مع خااالص تحياتي للجميع
( فارس الجحيم )